عدم انتظام ضربات القلب بيأثر على وظايف عضلة القلب، وبيخلي المريض يحس بنبضة مش عادية أو مش في وقتها الصح، يعنى ضربات القلب ممكن تكون سريعة أو بطيئة أو مش منتظمة. في الحالات دي القلب بيكون مش قادر يضخ الدم للجسم كله بنفس الكفاءة، ولو الحالة ماتعالجتش ممكن تحصل مضاعفات كتير للمريض، إنما لو اتشخصت واتعالجت صح من الأول المريض بيقدر يعيش حياته الطبيعية بصحة

المريض بيكون قلقان من المضاعفات، وانه ممكن يتعرض في أي وقت لسكتة دماغية أو فشل في القلب. كمان بيكون قلقان من النوبة اللي جايه..هتحصل فين وامتي وهل هيكون لوحده ولا معاه حد. وده بيكون صعب كمان على عيلته والناس اللي بيحبوه لأنهم بيكونوا قلقانين عليه، لكن المريض بيقدر يتغلب على الشعور ده بتفيذه لتعليمات الدكتور اللي بيختار طريقة العلاج المناسبة زي تركيب منظم لضربات القلب